Miembros del Seminariu de Llingua Asturiana piden a los profesores "asturianistes" de Filoloxía que se pronuncien sobre'l Mínor

Afirmen que-yos prestaba "sentilos apoyar" la propuesta del decanu, porque ye "la única opción" que-y queda al asturianu na Facultá

UVIÉU, 17 de Payares (EUROPA PRESS)

Miembros del Seminariu de Filoloxía Asturiana de la Facultá de Filoloxía de la Universidá d'Uviéu exixeron esta selmana a los profesores que llamen "asturianistes", ye dicir, los más cercanos a l'Academia de la Llingua Asturiana, un pronunciamientu sobre la propuesta del decanu, José Antonio Martínez, de crear un Minor de Llingua Asturiana. La mesma deberá sometese a votación na próxima Xunta de Facultá que, a falta de confirmación, prevése que va tener llugar la próxima selmana. "Prestábamos sentilos apoyar la única opción que queda de que l'asturianu entre nos estudios reglaos universitarios", afirmaron.

Nesti sen, espresáronse Ramón d'Andrés, coordinador del seminariu, y Juan Carlos Villaverde, ún de los más activos miembros del mesmu.

"D'Andrés quiso responder, en declaraciones a Europa Press, a les últimes declaraciones de l'anterior decana, y presidenta de l'Academia de la Llingua Asturiana, Ana Cano, que calificaba de "escasa", la propuesta del Mínor de 48 creitos de Martínez, de cara a la formación de los futuros profesores de Llingua Asturiana.

"Nun se trata de decidir si ye o non abondo, trátase de que ye la única opción que-y queda al asturianu pa entrar dientro de les enseñances reglaes de la Universidá, porque güei se mos presenta la elección ente'l Mínor o nada", afirmó d'Andrés. Nesti sen, foi claro: "nun los oyimos tovía apoyar el Minor", afirmó en referencia a Cano, y a otros profesores del que denomina sector "asturianista", tales como Xosé Lluis García Arias, Miguel Ramos Corrada o Roberto González-Quevedo.

El profesor, ex director de la Oficina de Política Llingüística del Principáu, quiso dexar claro que nun hai posibilidá d'escoyer ente un Mínor (conxuntu d'asignatures de 48 creitos) o un Maior (conxuntu d'asignatures de 72 creitos), o ente un Mínor y un Títulu de Grau, como plantegaron nesti momentu dalgunes organizaciones, tales como la Xunta Moza. "Esi alderique nunca existió, porque nunca hubo una propuesta de Maior d'asturianu, o de Títulu de Grau d'Asturianu", afirmó. "Lo qu'hubo foi una propuesta de Títulu de Grau de Llingües Modernes, y dientro del so Maior podía estudiase asturianu como Llingua A o como Llingua A", pudiendo tamién esta última cursase como un Mínor d'asturianu.

"Pero aquella propuesta refugóse en votación, y agora la única manera ye ésta, nun hai otra", afirmó d'Andrés, en referencia a la propuesta de Minor.

"Pa nós ye vital", esplicó, p'añadir que "nun se debería perder una oportunidá como ésta". De fechu, el Seminariu unvió a tolos profesores convocaos pa la Xunta una carta pidiendo'l votu a esta oción. Nesti sen, Villaverde espresó les sos "series reserves respecto a la opinón de dalgunos profesores supuestamente defensores del asturianu, porque tovía nun los sentimos apoyar el Mínor", afirmó.

EL MÍNOR "SUPÓN UN AVANCE"

Tanto p d'Andrés como pa Villaverde'l Mínor supón "un avance", con respecto al actual títulu propiu d'asturianu que la Facultá de Filoloxía ufierta en manera de títulu de postgrau, y que los alumnos deben cursar pagando'l so preciu, una vez algamada la so diplomatura (Espertu) o llicenciatura (Especialista).

En primer llugar, d'Andrés recuerda que "mientres el títulu propiu nun ye una enseñanza reglada y ta al marxe de la Facultá, el Mínor sí lo ye, va tar homologáu dafechu dende les instancies europees, con profesores universitarios y en manes de la Facultá". Esplicó amás que los que lu cursen van tener, xunto al so Títulu de Grau, un certificáu de Mínor en Llingua Asturiana que los va capacitar pa dar clases d'asturianu.

Refugó tamién les crítiques por nun ser "abondo", respecto a la so menor carga llectiva en comparanza col Títulu Propiu. Según d'Andrés, si bien el Mínor suma seis creitos menos qu'esti últimu, los nuevos creitos, tres la reforma d'ensenaza de filoloxía, van valir 25 hores llectives, mientres que los actuales valen diez.

Recordó amás que l'actual Títulu Propiu, que se punxo en marcha en 1994, frutu d'un acuerdu ente'l Rectoráu y l'Academia de la Llingua Asturiana, "entamó nun siendo bastante, pero toos lu apoyamos porque entendimos que yera un pasu positivu".

Agora'l Seminariu de Filoloxía Asturiana tien claro que la propuesta de Mínor supón un "progresu", tanto de cara al Títulu Propiu como en comparanza coles asignatures repartíes que nesti momentu se cursen dientro de los estudios de Filoloxía.