Mladic, acusáu de participar nun plan d'esterminiu de población non serbia

REUTERS/POOL NEW

LA HAYA, 16 de Mayu (Reuters/EP)

El fiscal del casu contra Ratko Mladic aseguró esti miércoles, na primer xornada del xuiciu contra'l excomandante militar serbo-bosniu, que'l procesáu y otros dirixentes serbios dividieron el territoriu de Bosnia con criterios étnicos y llevaron a cabu un plan conxuntu d'esterminiu de la población non serbia.

"La fiscalía va presentar les pruebes que muestren, más allá de toa duda razonable, la participación del señor Mladic en caún de los crimes", declaró'l fiscal, Dermot Groome, poco dempués de l'abertura del xuiciu en La Haya, sede del Tribunal Penal Internacional pa l'antigua Yugoslavia (TPIY).

Esti miércoles empezó'l xuiciu contra Mladic, que ta imputáu d'once cargos por crimes de guerra, crimes contra la Humanidá y xenocidiu en relación cola masacre de Srebrenica, l'asediu de Sarajevo y otros abusos cometíos mientres la guerra de Bosnia (1992-95). De salir culpable, podría quedar condenáu a cadena perpetua.

Ratko Mladic, de 70 años, compareció na sala con aires de confianza, mostrando'l pulgar p'arriba y aplaudiendo coles manes. L'exmilitar, vistíu de negru y con gafes escures, escuchó atentamente los alegaos del tribunal.

El xuiciu empezó un día dempués de que los abogaos de Mladic intentaren vetar al xuez, Alphons Orie, y de que'l TPIY decidiera refugar esti nuevu intentu de retrasar el procesu. Delles madres de les víctimes de Srebrenica concentráronse esti miércoles ante la sede del Tribunal.

El xuez declaró nel entamu de la sesión que la defensa decidiera nun lleer la so declaración inicial a la espera de que fueren los fiscales los qu'espunxeren en primer llugar los sos argumentos. Un total de 413 testigos van declarar ante la sala. Los fiscales van empezar a presentar les sos evidencies y a llamar a los sos primeros testigos el próximu 29 de mayu.