Muerre apuñaláu en Colombia un mozu vecín de Xixón cuando visitaba al so padre nel so país natal

XIXÓN, 22 de Mayu (EUROPA PRESS)

El xoven Jairo Cardona Vergara, de 17 años, residente en Xixón anque nacíu en Colombia, morrió esti fin de selmana nel so país natal, a onde fuera a pasar un mes pa visitar al so padre. La noticia de la muerte del rapaz, que morrió apuñaláu nel esterior d'un establecimientu hosteleru, pue vese na páxina Web del Xixón Rugby Club, equipu del quel que yera xugador cadete.

L'entrenador de Cardona, Arcadio Fernández, señaló a Europa Press que fuera'l mozu'l que contactara col Club, nel que llevaba yá dos temporaes. Nesti sen, aprovechando'l tornéu de rugby playa que se va celebrar esti próximu sábadu en Poniente, va rindíse-y homenaxe per parte de los sos compañeros y demás equipos participantes.

Los fechos tuvieron llugar la nueche del pasáu sábadu -horariu de Colombia--, cuando Cardona Vergara saliera a celebrar la graduación d'un amigu o familiar. Nel esterior del llocal, el grupu de mozos tuvo un problema con un home d'unos 30 años, y entamó una engarradiella. El mozu, al querer mediar pa evitar el choque, recibió delles puñalaes mortales, mientres que'l supuestu autor del delitu resultó deteníu.

El mozu, que vivía en Xixón cola so madre y el so hermanu pequeñu dende unos cuatro años, estudiaba cuartu de la ESO nel IES Calderón de la Barca. Dase la circunstancia que la madre tornara a España unos díes antes del sucesu, pero yá se treslladó otra vuelta a Colombia. Fernández indicó que nun pudo tovía falar cola familia, anque añadió qu'hai xente del Club intentando ponese en contactu cola madre.

Coles mesmes, el Club espresa na Web el so más sentíu pésame a la familia del mozu y señala que la noticia del fallecimientu supunxo pa toos ellos "un gran palu", sobre manera pa los sos compañeros del equipu cadete. Tamién nel Facebook del Club fueron dexándose mensaxes de condolencia de compañeros de distintos equipos y de familiares d'otros xugadores.