El Niemeyer, citáu pola revista 'Time' como exemplu d'espilfarru de grandes obres feches n'España

XIXÓN, 22 de Mayu (EUROPA PRESS)

La revista 'Time' fixóse nel Centru Cultural Óscar Niemeyer, d'Avilés, como exemplu de les grandes obres 'faraóniques' feches n'España mientres la época del 'boom' inmobiliariu y d'espansión económica y qu'agora, cola crisis, tán en desusu o baxaron la so actividá.

Asina figura nún de los sos artículos, recoyíu por Europa Press y tituláu 'White Elephants on Parade: The unloved new castles in Spain', algo asina como'l desfile de los elefantes blancos, los nuevos castiellos non queríos d'España, con alusión a la señal d'ostentación que se solía facer n'époques yá pasaes.

Del Niemeyer destácase les sos grandes esposiciones y el so gran espaciu escénicu, amás de que l'edificiu diseñólu l'arquitectu brasileñu pa una ciudá del Norte d'España, nel puertu d'Avilés. Coles mesmes, calcó en que tres esta gran inversión, dexó de programar en menos d'un añu dempués d'inauguralu en marzu del 2011.

El d'Avilés nun ye l'únicu exemplu que se cita. Ente otres obres faraóniques' que se citen ta la de la Ciudá de les Artes y les Ciencies de Valencia, tornada por causa de la crisis y d'una campaña en contra del arquiteutu que lu diseñó, Santiago Calatrava, según la revista, en símbolu del escesu que se llevó a cabu n'España.

Cálcase, amás, en cómo ente últimos de los años 90 y primeros del 2000, conceyos y gobiernos autonómicos aprovechaben el dineru recibíu de la Unión Europea pa construyir grandes infraestructures, especialmente centros culturales o deportivos, p'atrayer turismu a ciudaes alloñaes de los llugares más conocíos, como son Madrid y Barcelona.

GUGGENHEIM, PUNTU DE PARTIDA

Como puntu de partida de too ello méntase al Guggenheim, de 1998, del que señala que poco importaba la esposición, sinón l'enorme edificiu diseñáu pol arquiteutu Frank Ghery. Ello ye que llégase a falar nel artículu del efectu llamada de Bilbao, esto ye, planiar un maxestosu centru cultural y encargar la obra a un arquiteutu de reconocíu prestixu como forma de garantizar l'éxitu y l'atracción de turistes.

Tamién se fala de la Ciudá de la Cultura, un campus de Peter Eisenman, que contién un muséu, una biblioteca y un espaciu d'actuación en Santiago de Compostela (Galicia), obra pa la que s'acabó'l dineru antes d'executar dos de los seis edificios previstos.

Pero non sólo l'artículu numbera grandes obres, sinón qu'amás resalta la guerra por captar compañíes de vuelu de baxu costu y la proliferación de llinies. Especialmente cítase tamién los casos de dos aeropuertos, el de Castellón y el de Ciudá Real, de los que remarca que vieron tolos sos vuelos comerciales cancelaos y tán agora vacíos.