La organización universitaria Fai! entiende que'l mínor d'asturianu nun basta p'asegurar la formación de los docentes

UVIÉU, 06 d'Ochobre (EUROPA PRESS)

La organización universitaria Fai!, presente nel Claustru de la Universidá d'Uviéu, afirmó güei que la propuesta de crear un 'mínor' d'asturianu nos estudios de filoloxía nun ye bastante, porque "nun llegaba al mínimu de los conteníos básicos p'asegurar que la llingua puea siguir siendo enseñada nos centros de primaria y secundaria por maestros y profesores filólogos cualificaos"

La organizción recoyó nun informe públicu, la so postura sobre la posibilidá de crear esti 'mínor', o itinerariu curricular menor dientro de los estudios de filoloxía. Resumió les conclusiones nun comunicáu al que güei tuvo accesu Europa Press.

Dende'l so puntu de vista "la propuesta del Decanu nun ta a l'altura de les necesidaes y capacidaes científiques de los propios estudiosos de la llingua asturiana na institución académica". Esti "personal que vien demostrando la so capacidá, hasta nes situaciones más adverses, y que tien nesta reforma universitaria la oportunidá de quedar nel sitiu que merez", señaló'l testu.

Fai! entiende que "la mencionada propuesta nun cubre les necesidaes formatives de los futuros filólogos que quieran tener como ámbitu d'estudiu y actuación la llingua asturiana". Con esta decición, "l¡horizonte d'una meyora educativa quedaría definitivamente descartáu", añadió.

El colectivu plantega tamién que "si la concentración de tolos estudios d'asturianu na titulación propuesta supón la perda de materies qu'agora s'estudiaben per optatividá y llibre configuración, la Universidá asturiana tará renunciando a calces válidos pa la promoción y l'aproximación del alumnáu xeneral a esta área de conocimientu".

Pidió tamién "una respuesta desixente, reflexonada, pero desinteresada y firme, dende tolos sectores sensibles a la dignificación del estatus universitariu de la llingua asturiana: seyan académicos, políticos, culturales, xuveniles, estudiantiles, etc".