Pide que la llucha escontra'l terrorismu nun seya una escusa pa rebaxar el respetu polos derechos humanos
Alerta de la marxinación que sufren los xitanos y del altu númberu de casos nos que se violen los derechos fundamentales na UE
ESTRASBURGO (FRANCIA), 14 de Xineru (EUROPA PRESS)
El plenu del Parlamentu Européu aprobó güei un testu que pide más fondos comunitarios y planes específicos pa promover les llingües minoritaries na UE. Ye una demanda incluyida nuna declaración que mostró la so preocupación pol "altu númberu" de casos nos que se violen los derechos fundamentales nos países de la Unión Europea y aludió, ente otros exemplos, a la discriminación que sufren minoríes, como la etnia xitana, a les crítiques que "alimenten l'odiu y la violencia" escontra los homosexuales y a la "situación de riesgu" de los inmigrantes.
El testu --aprobáu con 401 votos a favor, 220 a la escontra, y 67 astenciones-- recuerda que "el derechu a falar y a educase na llingua materna ye ún de los derechos fundamentales más básicos". Repasa amás la situación de los derechos fundamentales na Unión Europea ente los años 2004 y 2008.
No referente a violaciones de derechos, el manifiestu muéstrase francu. "Nun podemos denunciar Guantánamo o Abu Ghraib si nun denunciamos les violaciones de derechos fundamentales que pasen equí (n'Europa)", señaló'l ponente del informe adoptáu esti miércoles n'Estrasburgo (Francia), l'italianu Giusto Catania. L'eurodiputáu alvirtió de la necesidá d'una "política activa" y de "analizar" la situación de cada Estáu miembru "pa que nun se mos acuse d'utilizar un doble raseru".
Los eurodiputaos pidieron a la UE una mayor firmeza pa facer valir el respetu pol Derechu Internacional na so cooperación con países terceros pa lluchar contra'l terrorismu. D'esta manera, consideren que van evitar que l'amenaza internacional valga como prestestu pa rebaxar el cumplimientu de derechos esenciales como'l de "la vida privada, la proteición de datos o la discriminación".
La Eurocámara tamién celebró'l propósitu del presidente electu d'EE.UU, Barack Obama, de pesllar el centru de detención de Guantánamo y entregar a la xusticia a los presos reteníos. Nesta llinia, encamentó a los 27 a "alcontrar conxuntamente soluciones" pa los reos y llamentó que nin instituciones europees nin Estaos miembros atendieron a les recomendaciones que'l Parlamentu Européu adoptó en febreru del 2007 sobre les actividaes de la CIA n'Europa.
DIFICULTAES PA LES MINORÍES
Ente los principales problemes señalaos pol informe consta la discriminación que sufren les minoríes na Unión Europea y especialmente, la "frecuente negación de los sos derechos", a la población xitana. Los eurodiputaos se refirieron al "estendíu sentimientu anti romaní", pero tamién criticaron los controles selectivos con toma de güelgues y otros tipos de ficha realizaos pola Policía en función de la raza.
Tres declarar la so "consternación" polos inmigrantes que perdieron la vida nel intentu de llegar a territoriu européu, la Eurocámara reclamó modificar el mandatu de Frontex pa qu'incluya'l salvamentu marítimu.
Amás, pidió que se dea prioridá a les polítiques d'inmigración "realistes y a llargu plazu" penriba de meyores midíes de control de les fronteres. L'ausencia d'aiciones eficaces pa la integración de los inmigrantes irregulares los coloca nuna situación de "esposición a peligros" qu'abre la vía a la "radicalización, tráficos y otres formes d'esplotación".
COMENTARIOS QUE "ALIMENTEN L'ODIU"
L'informe adoptáu condena los comentarios discriminatorios realizaos por "cabezaleros relixosos, sociales y políticos" contra los homosexuales, porque "alimenten l'odiu y la violencia" escontra esti colectivu y encamienta a les autoridaes a condenar esti tipu d'espresiones. A esti pidimientu se sumó la promovida por Francia pa la despenalización universal de la homosexualidá, puesto qu'en 91 países tovía ye un delitu que pue castigase hasta con pena de muerte.
De la mesma maneera, la Eurocámara encamentó a los 27 a favorecer una eduación sexual apropiada al traviés d'información y servicios d'asesoramientu confidenciales y que "faciliten métodos anticonceptivos col fin tou embaranzu non deséu y los albortos illegales y en situación de riesgu".
El documentu fai referencia igualmente a la "dignidá al final de la vida" y pide a los Estaos miembros qu'adopten la so llexislación pa garantizar que la voluntá manifestada en vida seya tomada en consideranza y que se respeten "los deseos espresaos anteriormente" por un paciente que nel momentu d'atendelu nun pudo manifestase.
Los eurodiputaos tampoco olviden a los neños nel informe pa denunciar qu'un 20% de menores vien perbaxo de la llende de probitú na Unión Europea y piden a los países que fixen "oxetivos ambiciosos" pa reducir la probitú infantil. Reclamen, igualmente, midíes eficaces escontra la esplotación infantil en forma de prostitución, pornografía, tráficu de drogues, robu o llabor de mendigu.
