Rajoy encamienta a Europa defender la sostenibilidá de la deuda pública

MADRID, 16 de Mayu (EUROPA PRESS)

El presidente del Gobiernu, Mariano Rajoy, pidió un mensaxe "claru y contundente" en defensa del euru y una afirmación en favor de la "sostenibilidá de la deuda pública de tolos países del euru.

Tres la so intervención nel plenu de control del Congresu de los Diputaos, Mariano Rajoy compareció ante los medios pa reclamar a Europa esti mensaxe, anque nun precisó quién lu debía emitir, y tamién dexó claro que nun se faló nes últimes hores nin d'intervención d'España, nin de nengún tipu d'ayudes.

El xefe del Executivu recordó les dificultaes que ta creando la subida de la prima de riesgu pa España, y quiso dexar claro que "güei, la prioridá ye la sostenibilidá de la deuda pública de toos".

En recordando que'l so gobiernu va siguir coles polítiques que ta llevando a cabu d'austeridá y reformes y precisó que'l debate qu'hai n'Europa sobre austeridá y crecimientu nun tien sentíu porque ambes cuestiones son compatibles y complementaries, dexó claro que quería falar d'un asuntu del que dixo, "güei naide fala", la necesidá de defender l'euru y la deuda pública de los países que lu componen.

"Prestábame tamién un mensaxe claru, contundente, en defensa del proyectu del euru y una afirmación en favor de la sostenibilidá de la deuda pública de tolos países europeos que nesti momentu ta sometida a debate", aseveró, al tiempu qu'insistía en que'l Gobiernu d'España sabe lo que tien que faer, ye consciente de la "dificultá" y va siguir coles polítiques que punxo en marcha.

"YO NUN VOI PIDIR NADA"

Rajoy nun especificó quién tien qu'enviar esi mensaxe y a preguntes sobre si-y prestaría qu'actúe'l Bancu Central Européu, respondió: "yo nun voi pidir nada porque creo que facer declaraciones públiques pidiendo coses nun tien sentíu".

Pero insistió nel so mensaxe de que l'euru ye un proyectu básicu, lo más importante de lo que "ficimos los europeos" y agora precisa "salir reforzáu". Nesti puntu, dexó claro qu'él nun quier que Grecia salga del euru, porque entiende que "sería un error mayúsculu, un gran equivocación", pero calcó na necesidá de "garantizar la sostenibilidá de la deuda pública y dempués, toos van cumplila colos compromisos, que ye lo que tán intentando facer España, Italia" y el restu de los países.

Ante la pregunta de si falara nes últimes hores cola canciller alemana Angela Merkel o colos otros socios europeos y si se trató la posibilidá d'un rescate pa España o algún tipu d'ayudes, Rajoy aseguró que fala con tolos dirixentes europeos casi toles selmanes.

No referente a la opción de la intervención, dexó claro que "de nenguna manera". "D'eso nun se faló nada, absolutamente nada", repostió, de la que volvía calcar en que "güei, la prioridá ye la sostenibilidá de la deuda pública de toos".

SITUACIÓN COMPLICADA QUE FAI BIEN DIFÍCIL FINANCIASE

Mariano Rajoy insistió en que la situación creada pola subida de la prima de riesgu español, que güei superó la barrera sicolóxica de los 500 puntos, ye "ye mui difícil, complicada". "La prima de riesgu subió muncho, ye mui difícil financiase", esclamó, y mostró'l so convencimientu de que "hai que facer delles coses n'España y otres n'Europa".

No que se refier a España, mostróse convencíu de que les midíes que ta adoptando'l so Executivu son les que "hai que tomar". Recordó la necesidá de reducir el gastu públicu porque nun pue gastar lo que nun se tien. "Sobremanera si nun mos empresten", argumentó. Tamién insistió na necesidá de siguir alantre coles reformes que ta poniendo en marcha pa que la economía y les empreses puean "crecer, producir y crear empléu". Y a lo último, apuntó, hai que saniar el sistema financieru, que, repostió: "ye lo que ficimos".

Sobre esto últimos, recordó que tien munches dificultaes pa pagar los sos vencimientos de deuda nel mercáu y amás, nun pue dar creitu. La so conclusión ye que n'España ta siguiéndose la llinia qu'hai que siguir, la "afayadiza", y mostróse convencíu de que "el ritmu establecíu ye'l correctu".

En cuanto al debate que se ta produciendo n'Europa sobre'l crecimientu y l'austeridá, dixo que tien "bien poco sentíu" porque, na so opinión, "una cosa ye compatible cola otra y una cosa ye necesaria pa la otra".

"Nun pue gastase lo que nun se tien, ye de sentíu común, sobremanera sinón te lu empresten, dempués, hai que tomar midíes compatibles cola austeridá, pa favorecer el crecimientu económicu", resumió, de la que dexaba claro qu'él, neso, "tamién ta d'acuerdu".

Pero insistió en que "hai una tercer cosa" de la que "naide fala" que ye la necesidá de garantizar la sostenibilidá de la deuda pública de tolos países del euru.