Reconstrúin el pene d'un 'bebé' con una técnica pionera n'España

SEVILLA, 17 de Mayu (EUROPA PRESS)

L'Hospital Universitariu Reina Sofía de Córdoba realizó con éxicu la primer intervención que se lleva a cabu n'España por afalia conxénita a un 'bebé' que nació con testículos, pero sin pene, gracies al empléu d'una técnica descrita recientemente y que namás se llevó a cabu en cinco neños en tol mundu, dao que, hasta hai cinco años, cuando se describió la primer vez la técnica, esperábase a la edá adulta pa intervenir.

El principal espertu internacional nesti tipu de ciruxía, Rafael Gosálbez Rafel, urólogu pediátricu del Miami Children's Hospital n'EEUU, desplazóse precisamente hasta'l complexu sanitariu cordobés pa practicar esta complexa operación, efectuada nel marcu de la 51 edición del Congresu de la Sociedá Española de Ciruxía Pediátrica, qu'entamen los ciruxanos pediátricos del Hospital Reina Sofía.

D'esta manera, profesionales de la Unidá de Ciruxía Pediátrica de la Reina Sofía de Córdoba collaboraron col doctor Gosálvez na realización "d'esti finxu médicu", como resaltaron dende la Xunta, qu'eponderaron tamién el fechu de que, cola ciruxía practicada en Córdoba, esti ciruxanu afincáu n'EEUU suma trés pacientes padiátricos interveníos por esta técnica.

Los ciruxanos del hospital cordobés, y d'otros centros nacionales, cuenten con esperiencia previa en patoloxíes reconstructivas del pene n'adultos o adolescentes, pese a que nunca se realizara una intervención per mediu d'esta técnica nun lactante.

Nesta malformación, la uretra desagua nel anu --polo que miccionen al traviés del mesmu-- y nun existe'l pene. La enfermedá ye bien pocu frecuente, pues afecta a ún de cada 30 millones de recién nacíos vivos, y hai sobre 80 casos descritos a nivel mundial.

La reconstrucción del pene nos bebés y neños per malformación conxénita llama especialmente l'atención porque existe bien poca esperiencia a nivel mundial al respecto, ente otros motivos, pola so baxa incidencia. La intervención quirúrxica non sólo ye necesaria dende'l puntu de vista xenital, sinón que ye clave pa caltener los reñones d'infecciones frecuentes y evitar el fracasu renal.

L'afalia conxénita, descrita en 1853 por Imminger, defínese como un fallu del tubérculu xenital y ta considera como una forma desaxeradamente rara de xenitales ambiguos. Los bebés que nacen con esta malformación han evalualos darréu pa determinar si existen malformaciones asociaes, yá seya nel tracto urinariu o n'otros órganos y sistemes.