Rubalcaba pidirá a Rajoy defender xuntos los eurobonos

MADRID, 21 de Mayu (EUROPA PRESS)

El secretariu xeneral del PSOE, Alfredo Pérez Rubalcaba, va telefoniar esti llunes al presidente del Gobiernu, Mariano Rajoy, y propondrá-y defender conxuntamente na UE la creación d'eurobonos, un cambiu na posición del Bancu Central Européu (BCE) y un plan de crecimientu européu, según adelantó nuna entrevista na Ser recoyida por Europa Press.

Rubalcaba mostróse convencíu de qu'ambos puen tar d'acuerdu nesos pidimientos, que "ayudaríen a crecer a España" y añadió que tamién-y plantegará la necesidá de qu'España pida una ampliación del so plazu de consolidación fiscal, anque neso reconoció que ye "más difícil" el consensu.

El líder de la oposición almitió tamién que la creación d'eurobonos y los cambios nel BCE nun puen facese al cortu plazu, pero considéralos "fundamentales" pa España. En cuanto al plan de crecimientu, apostó por aumentar los ingresos del presupuestu européu col impuestu de transacciones financieres y concentrar los recursos de la UE n'educación, I+D y empléu xuvenil. A eso sumaríase'l refuerzu del Bancu Européu d'Inversiones (BEI) con un sistema de bonos pa financiar infraestructures.

D'esta manera, Rubalcaba dexó claro que de la conversación qu'espera caltener con Rajoy nun pretende sacar un comunicáu conxuntu, nin va tratar de pactar los recortes, sinón que va intentar qu'España vaya "con una sola voz" el miércoles a Bruxeles. Rubalcaba va participar nun conceyu de socialistes europeos y Rajoy va dir al del PPE antes d'acudir como presidente del Gobiernu a la cena del Conseyu Européu. Pal líder del PSOE ye importante qu'ambos vayan con una sola voz.

NUN TIEN EL MÓVIL DE RAJOY

El dirixente socialista mostróse esperanzáu en poder acordar con Rajoy una posición ante la reunión: "nun tengo razones pa pensar que nun quiera lo meyor pa España y toi convencíu de qu'esto ye lo meyor pa España". Rubalcaba reconoció na entrevista nun tener el teléfonu móvil de Rajoy y dixo que nun sabe si Rajoy tien el suyu, pero dexó claro qu'eso nun ye problema pa qu'ambos se comuniquen.

Pa Rubalcaba, lo importante ye que la UE dea un xiru y entame a promover el crecimientu -"sin esi cambiu podemos pasalo bien mal, tamos pasar bien mal", dixo, y pidió a Rajoy que se sume a esi cambiu. "Yo creo que sí, yo pienso qu'Europa va xirar, probablemente non con tola contundencia qu'España precisaría, pero yo creo que sí, que van abrise nueves víes, y lo qu'hai que facer ye tar ehí", destacó.

Asina, recordó que los socialdemócrates europeos lleven meses falando de la necesidá de crecer, y qu'agora yá lo faen tamién el primer ministru italianu, Mario Monti, y la canciller alemana Angela Merkel. Rubalcaba llamentó que Rajoy nun fale "muncho" de crecimientu, pero sorrayó qu'España ye probablemente'l país que más precisa esi xiru de política na UE.