Los sindicatos convoquen cuatro xornaes de güelga polos recortes a la minería

UVIÉU, 21 de Mayu (EUROPA PRESS)

Los sindicatos CCOO y UXT zarraron esti llunes el calendariu de movilizaciones en protesta polos recortes que los Presupuestos Xenerales del Estáu prevén aplicar a la minería, que va incluyir cuatro xornaes de güelga xeneral pa los próximos díes 23, 24, 30 y 31 de mayu nes comarques mineres.

El paru del día 24 va contar con una concentración en caúna de les comarques mineres y el día 31 va haber una manifestación conxunta en Madrid. Esti acuerdu ratificóse mientres una xunta n'Uviéu de los dirixentes de les federaciones de la minería de CCOO y de la d'industria y trabayadores agrarios (Fitag) d'UXT.

Y too pa reclamar al Executivu lideráu por Mariano Rajoy que "cumpla colos sos compromisos" y dea "un pasu atrás" nes tresferencies previstes pa la minería nel proyectu de Presupuestos Xenerales del Estáu pal 2012, que suponen "la condena del sector" y "el zarru de l'actividá", aseguró nuna rueda prensa posterior a la xunta'l secretariu d'Industries Extractivas de la Federación d'Industria de CCOO, Juan Carlos Álvarez Liébana.

Nesti sen, Víctor Fernández (Fitag-UXT) dixo que nel 2012 les partíes destinaes a la producción de mineral recibiría un 64 por cientu menos que l'añu anterior, pasando de 703 a 253 millones d'euros. En concreto, les ayudes a empreses van pasar de 301 a 111 millones, les d'infraestructures de 167 a 101,6 (-39 por cientu) y les de proyectos empresariales de 167 a 39 (-76,6). Coles mesmes, les partíes pa formación y beques van cayer de 56 millones a 2 (-99,96) y les de seguridá minera, que nel 2011 cifróse en 12 millones, van anulase.

Estos recortes supondríen, según Liébana, "una agresión nunca vista" nel sector mineru y llevaríenmos "al ostracismu más absolutu".

"Esta situación nun pretende más que'l zarru del sector y condena a les comarqes mineres a la esraizadura social y económico", añedió.

Llébana esplicó que la güelga nun yera la primer opción de los sindicatos mineros, pero, tres la rotura del diálogu social, viéronse "obligaos" a tomar estes midíes. Con elles pretenden buscar soluciones dirixíes a la sobrevivencia del sector y, pa ello, van esixir al Gobiernu "que cumpla los sos compromisos".

De lo contrario, estes midíes nun van quedar nestes concentraciones, dixo, dao que tán dispuestos a tomar "les decisiones necesaries" pa evitar "el fallecimientu" de la minería.