Softastur va tornar al asturianu una versión educativa del sistema operativu GNU-Linux

UVIÉU, 05 de Marzu (EUROPA PRESS)

L'asociación Softastur, dedicada a la promoción del 'software' llibre n'Asturies, anunció güei per nota prensa, que va tornar Edubuntu, "una distribución del Sistema Operativu GNU-Linux empobinada a escolinos de 6 a 18 años y desendolcada internacionalmente por reconocíos educadores y teunólogos".

L'asociación esplicó qu'Edubuntu ye una derivación oficial de la distribución GNU/Linux Ubuntu, destinada pal so usu nel ámbitu escolar. "Desendólcase en collaboración con docentes y teunólogos de dellos países y construyóse sobro Ubuntu. Incorpora usos educativos específicos, con un oxetivu nidiu: la población ente los 6 y los 18 años", añadió.

Softastur matizó que "nos caberos meses pudo vese la situación llamentable que se vien dando col asturianu en maxisteriu, y por estensión, nel sistema educativu asturianu". "Énte la posible tentación a que daquién diga qu'ufrir estudios n'asturianu puede ser mui costosu, Softastur quier aportar el so granín de sable traduciendo al asturianu software educativu de calidá contrastada internacionalmente y ufriéndolo de baldre", añadió l'asociación.

Calcula'l colectivu que pue tar llistu'l 100% del programa a últimos d'abril y ponse a disposición de docentes y centros interesaos en instalar y usar Edubuntu. Namás que tienen de contautar al traviés del formulariu disponible na direición http://softastur.org/contautu.php

Softastur recordó que ta acabante de traducir el 100% de la 'suite' oficial del sistema operativu Ubuntu en Llingua Asturiana. El trabayu desendolcáu dende Softastur veráse reflexáu na próxima versión del Sistema Operativu Ubuntu: Jaunty Jackalope que saldrá n'abril, y qu'inclúi aplicaciones como la 'suite' ofimática Open Office, Gimp, Firefox y otros.