UVIÉU, 01 de Setiembre (EUROPA PRESS)
L'Asociación de Trabayadores de Normalización Llingúística (ANTL) d'Asturies anunció güei la denuncia de la convocatoria d'una plaza pa esti serviciu nel conceyu de Samartín del Rei Aurelio, por delles "irregularidaes", ente les que tán la desconocencia de la baremación, l'ausencia de temariu y el carácter non apropiáu de les pruebes selectives.
Al traviés d'un comunicáu, al que tuvo accesu Europa Press, el colectivu denunció la situación y criticó'l llabor d'Ayuntamientos y Conseyería de Cultura na xestión de los Servicios de Normalización existentes.
Ente les irregularidaes, el testu señaló tamién el que "nun quede claro si va facese fase d'oposición, y que tampoco s'indique cuála ye la puntuación de cada prueba".
Dende l'ATNL, entienden que "que les places de téunico en normalización llingüística han tar unificaes no tocante a les pruebes selectives". "Dende hai años los responsables de los Servicios de Normalización venimos defendiendo que los procesos de selección de los Servicios pasen per una serie de pruebes onde s'evalúen non sólo los conocimientos xenerales propios de la plaza (Estatutu d'Autonomía, llexislación sobre la llingua asturiana, normalización nel ámbitu de los conceyos) sinón qu'ha evaluase de manera oxetiva'l conocimientu y la competencia llingüística de los aspirantes con pruebes escrites y orales", añadió. "Tamién ye importante la composición del tribunal, onde tien d'haber persones especialistes en llingua asturiana y en normalización llingüística", señalaron.
L'asociación vien reclamando a la Conseyería de Cultura "una implicación mayor nos procesos de creación de SNL". "Dende l'ATNL consideramos que'l papel de la Conseyería de Cultura ye más que repartir sovenciones pa la creación de los Servicios, ha vixilar cómo se creen, asegurando la mayor efectividá del mesmu", señaló.
"Siguimos esperando la solución a la inestabilidá qu'añu tres añu venimos denunciando los SNL y que pasa necesariamente pela firma de convenios ente los Conceyos y la Conseyería de Cultura, cosa qu'hasta'l momentu la Conseyería negóse facer", denunció'l comunicáu tamién.
Dende l'ATNL pidióse, "non sólo a los Conceyos, sinón tamién a la Conseyería de Cultura, que los procesos selectivos se faigan con seriedá y tresparencia, yá que d'ello depende'l posterior trabayu de normalización".