Refuga'l recursu del abogáu del Principáu Xurde Blanco contra una denegación d'un permisu llaboral por solicitalu en llingua
UVIÉU, 24 de Marzu (EUROPA PRESS)
El Xulgáu de lo Contencioso-Alministrativo númberu 3 d'Uviéu refugó güei'l recursu del xurista de l'Alministración autonómica, Xurde Blanco, contra la denegación d'un permisu llaboral que solicitó por tar escritu n'asturianu, puesto que "nun tien derechu a relacionase cola Alministración del Principáu na llingua asturiana, cuando actúa na so condición de funcionariu".
El Gobiernu del Principáu unvió una nota de prensa na qu'informaba de la decisión xudicial, añediando que, según la sentencia, "el comportamientu del funcionariu que presentó'l contenciosu paez movese pol únicu interés d'interferir nel bon funcionamientu de l'Alministración". Amás, afirma qu'el mesmu xuez cuenta que "l'actitú del funcionariu, inorando una instrucción de los sos superiores, debió dar llugar a una "corrección disciplinaria".
La sentencia dexa claro, según el Principáu, que Xurde Blanco Puente "nun tien derechu a relacionase cola Alministración del Principáu na llingua asturiana, cuando actúa na so condición de funcionariu", y que l'Alministración del Principáu d'Asturies en nengún momentu "dio-y un tratu desigual", como él denunciara.
Asina, recuerda que "l'entamu d'esti conflictu remóntase a xunetu del 2006, cuando'l Director Xeneral de Relaciones Institucionales y del Serviciu Xurídicu unvió una circular a tol personal del Serviciu Xurídicu dando instrucciones pa que'l personal de la Dirección, y específicamente los lletraos, utilicen la llingua castellana nos escritos oficiales que se redacten". "Según recueye la sentencia esta cuestión desconozla abierta y flagrantemente" el funcionariu demandante, "nuna actitú que pretende menospreciar el principiu d'autoridá de los sos superiores".
Nel fallu del Xulgáu Contenciosu Alministrativu nº 3 d'Uviéu recuéyese tamién una valoración sobro la conducta del recurrente que, según diz, "apaez teñíu por notes que definen la mala fe procesal" y "paez movese col únicu interés d'interferir nel bon funcionamientu de l'Alministración, pa la qu'empresta los sos servicios, y a que'l so interés tien d'atender, con llealtá y honradez".
L'Alministración autonómica entiende que "per cuarta vegada, escláriase que la forma alministrativa de proceder foi la correcta y non se conculcó nengún derechu". "L'actitú del Gobiernu del Principáu d'Asturies foi siempres de respetu y cumplimientu de la Llei d'usu y promoción del bable, onde s'establez el derechu de los ciudadanos a dirixise n'asturianu a l'Alministración autonómica", añedió. "Otra cuestión ye, tal que señala'l maxistráu, lo que pretendía'l demandante, una y bones", señala citando la sentencia, "nun puede invocar una previsión llegal establecida pa los ciudadanos y non puramente pa el que caltien una relación estatutaria cola Alministración a la qu'empresta los sos servicios".
Dende'l Gobiernu asturianu llaméntase que "actitúes individuales como les d'esti funcionariu, que recurrió hasta a la descalificación personal de les persones que nel so día dictaron a la instrucción interna d'usu del castellán nos escritos oficiales, contribuyan a poner n'entredichu l'actuación de l'Alministración y a xenerar tracamundiu ente la población asturiana".
