La Xunta pola Llingua apoya la valoración del asturianu como méritu y acusa a los que s'oponen a ello d'intoxicar

UVIÉU, 11 de Marzu (EUROPA PRESS)

La Xunta pola Defensa de la Llingua Asturiana mostró güei'l so apoyu a la iniciativa del Conceyu de Cangas del Narcea de valorar el conocimientu de la llingua asturiana nes sos convocatories públiques d'emplegu. De la mesma manera, denunció "la campaña d'intoxicación que dende dellos sectores ta llevándose alantre contra esta midida".

Voceros de la xunta ofrecieron güei una rueda de prensa en Cangas del Narcea, conceyu que, xunto col de L.lena, anunció que va valorar la conocencia d'asturianu como méritu nes sos oposiciones municipales.

"Defendemos que los vecinos y vecines de Cangas podamos escoyer con llibertá, ensin presiones y n'igualdá de condiciones, la llingua que queramos -asturianu o castellanu- nes nuestres comunicaciones de pallabra o per escrito cola Alministración del conceyu", afirmó la Xunta nun comunicáu.

Pa la organización, las opiniones espresaes nos últimos díes contra esta midida, surdíes dende'l Gobiernu autonómicu, el PP y los representantes sindicales d'UXT y CC.OO na zona, son "ataques que representen la escenificación del despreciu más absolutu hacia la nuesa llingua y hacia los derechos llingüísticos de los vecinos y vecines del Conceyu de Cangas".

Pa la organización, "de nenguna manera esta midida pue suponer una imposición de la llingua asturiana". "Tenemos que recordar lo evidente: equí la única llingua que s'impón ye'l castellanu. El castellanu sigue siendo la única llingua que ye condición indispensable p'acceder a les convocatories públiques d'emplegu", añadió'l colectivu".

Per contra, recordó que "la llingua asturiana sigue sin ser condición indispensable". "Simplemente", matizó, "va empezar a valorase positivamente'l so conocimientu, de la mesma manera que se valoren otros munchos conocimientos, titulaciones, cursos, talleres, etc, etc... en cualquiera de les convocatories públiques d'emplegu que se fixeron hasta agora nesti conceyu". "El dominiu de la llingua asturiana pue valorase nes ufiertes d'emplegu públiques porque asina ta reconocíu per llei", añade la nota.

Pa la Xunta, "el dominiu del asturianu ha valorase positivamente, non sólo porque la odiga la llei, sinón tamién porque ye una llingua viva ente la población canguesa, porque favorez la dignificación y promoción del nuesu patrimoniu llingüísticu y porque, como dicíamos primero, favorez que los vecinos y vecines de Cangas podamos escoyer con mayor llibertá la llingua que queramos meyor pa les nueses rellaciones coles alministraciones del conceyu".