Xuristes pol Asturianu acusa de discriminación llingüística al Conceyu de Llanera y pide que tramite la solicitú de Fai!

UVIÉU, 12 de Xineru (EUROPA PRESS)

L'Aconceyamientu de Xuristes pol Asturianu acusó ayeri al Conceyu de Llanera de discriminación llingüística al nun aceptar la conceyala de Cultura la presentación d'un escritu de l'asociación xuvenil FAI! por tar n'asturianu, y exixó la tramitación del mesmu al alcalde. El colectivu pidiere la utilización de la Casa de la Cultura pa celebrar un actu públicu mañana sábadu, día 13 de febreru.

La contestación dada per carta dicía que "dichu escritu debe presentase en castellán", con "escesos tipográficos" sorrayando la palabra castellán, según Xuristes.

"La Conceyala de Cultura y Muyer, Belén Rodríguez López, que ye quien robla esta ayalga, entendió, de la cabeza al rau, lo que se-y encamentaba polo que la esixencia de presentación del escritu en castellán ye, de mano, un actu cerriscu, intolerable nun cargu públicu d'una Alministración democrática", manifiesta'l colectivu xurídicu.

Asina, l'Aconceyamientu recordó'l "el derechu a nun ser discrimináu per razón de la llingua, proclamáu nos artículos 2 de la Declaración Universal de los Derechos Humanos y 14 de la Constitución española, porque la Conceyala entendió dafecho lo que se-y pidía, lo qu'acredita la respuesta que dio, polo qu'ésta, nos sos términos, nun pue tener otru oxetivu que la discriminación llingüística".

Defendió también los derechos fixaos al emplegu na vida pública de la llingua rexonal y el dirixise n'asturianu a l'Alministración, recoyíos na Carta Europea de les Llingües Rexonales o Minoritaries y na Llei d'Usu y Promoción del bable/asturianu.

Poro, Xuristes pol Asturianu pidió al alcalde, "ordenar darréu'l trámite y resolución del pidimientu" y "retirar la delegación de competencies a quien nun sabe facer un emplegu axustáu a derechu, tolerante y democráticu de les mesmes".