Rabih Abou Khalil libanoarrak kontzertua emango du maiatzaren 24an, "365 Jazz Bilbao" zikloaren baitan

BILBO 20 May. (EUROPA PRESS) -

Rabih Abou Khalil konpositore libanoarra izango da "365 Jazz Bilbao" zikloaren proposamena maiatzerako Bilboko Arteria Campos Antzokian. Libanoko konposatzailea 'Mediterranean Quintet' taldearekin batera arituko da maiatzaren 24an, arratsaldeko 20:00etan.

Musikari libanoarrak hizkera musikal propioa dauka, konposatzeko bere teknika originalari eta arabiar musikaren inguruan daukan ikuspegiari esker, eta jazzaren abangoardian finkatu da konposatzaile eta instrumentista modura. Emanaldirako sarrerak antzokiko leihatilan eta BBK sarean eros daitezke, sei euroko prezioan.

Bilbao 700-III Millenium Fundazioak antolatzen duen "365 Jazz Bilbao" kontzertuen zikloak aurrera jarraitzen du, edizio berria joan zen otsailean Erik Truffaz artistarekin hasiera ondoren. Horren ostean aritu ziren Jason Moran pianista eta konpositorea martxoan eta Maria Joao abeslariak eta Mário Laginha pianistak osatutako bikotea apirilean.

Rabih Abou Khalil konpositorea oud instrumentuan maisua eta orkestrako zuzendaria da. Abou Khalilek jazzaren izen handiekin, musikari tradizional arabiarrekin, harizko laukote klasikoekin edo musikari armeniarrekin grabatu du. Beiruten jaio zen baina Munichera joan zen Libanoko gerra zibilean, 1978an. Alemanian flauta klasikoa ikasi zuen Municheko Musika Akademian, Walter Theurerrekin, eta BBCko Symphony Orchestra-k eta Frankfurteko Ensemble Modern-ek lan sinfonikoak eskatu zizkioten.

Denboraldiak egin zituen Munichen eta Frantziako hegoaldean eta oso gaztetandik oud instrumentua jotzen ikasi zuen. Oud-a harizko instrumentua da, trasterik gabekoa, lautearen antzekoa. Instrumentu horrekin berezko estiloa garatu du, sarritan jazzaren gitarristen estiloarekin alderatu izan dena.

Izan dituen esperientzia guztiek aberastuta, Abou Khalilek banan-banan birsortzen ditu ekialdearen eta mendebaldearen arteko harreman hunkigarriaren loturak. Artista libanoarrak abangoardian kokatu da konpositore eta instrumentista modura. Konposatzeko bere teknika originalarekin eta musika klasiko arabiarraren inguruan daukan ikuspegi murrizketarik gabekoarekin, bere hizkera musikal bere-berezkoa aurkitu du.

Abou Khalilen eraginen artean daude free jazzaren musikariak, adibidez Ornette Coleman eta Don Cherry, bai eta Frank Zappa, Bela Bartok eta oso ezagunak ez diren beste artista batzuk, Mighty Sparrow edo Trinidadeko Lord Kitchener, esaterako. Grabatu dituen ia lan guztietan daude jazzaren elementuak, eta Steve Swallow edo Glen Moore bezalako musikarien kontrabaxua erabili ohi du.