Caride ve "ben" que persoas con "puntos de vista distintos" dean "un paso adiante" no PSdeG

SANTIAGO DE COMPOSTELA 8 Feb. (EUROPA PRESS) -

A vicevoceiro do Grupo Parlamentario Socialista, María José Caride, opinou este mércores que está "ben" que persoas que teñan "puntos de vista distintos" dean "un paso adiante" e disputen en liderado do PSdeG a Pachi Vázquez. En todo caso, pediu que teñan detrás "un proxecto", xa que, ao seu xuízo, este "non é o momento dun debate de caras".

"Pero canto máis debate, mellor; estamos no momento procesual adecuado para debater", argumentou a deputada viguesa, sumándose así á opinión doutros compañeiros de grupo como Ismael Rego e Beatriz Sestayo.

Dito isto, preguntada ao respecto en rolda de prensa, indicou que as alternativas só significan "máis opinións e, polo tanto, máis oportunidades para facer un proxecto crible para Galicia".

Ademais, recalcou que o PSdeG ten "moitas persoas capacitadas para liderar" a organización. Iso si, descartouse para competir pola secretaría xeral: "non pasa pola miña cabeza", asegurou.

UNIDADE

Sobre a chamada á "unidade" lanzada polo seu xefe de filas, deixou claro que "todos xuntos non quere dicir unha opinión unánime". "Podemos ter puntos de vista distintos, e iso enriquece o proxecto común", defendeu Caride.

En calquera caso, considerou "fundamental" a mensaxe de "unidade". "Unidade para loitar contra o PP e as súas medidas de recorte e contra un panorama económico que, desafortunadamente, demostra o fracaso da súa política económica", resolveu.