Os grupos de referencia competitiva recibirán entre 12 e 14 axudas, con importes entre os 50.000 e os 100.000 euros

SANTIAGO DE COMPOSTELA 20 May. (EUROPA PRESS) -

A Consellería de Cultura, Educación e Ordenación Universitaria publicou a convocatoria de catro axudas á consolidación e estruturación de unidades de investigación do Sistema Universitario de Galicia (SUG) por valor de 16,7 millóns de euros.

Deste modo, do total de 16,7 millóns dirixidos ao I+D+i das universidades galegas, para este ano 2012 hai un presuposto de 5.480.000 euros.

Con estas catro convocatorias desenvólvese o Plan I2c no referente á investigación universitaria, ao que se une as axudas dos proxectos de investigadores emerxentes que se publicarán en próximas semanas.

Con iso impúlsase un modelo de financiamento no que os grupos de investigación reciben un financiamento estrutural fixo se conseguen uns obxectivos de crecemento e fortalecemento, no que prima a calidade.

"APOSTA ESTRATÉXICA"

Segundo explica a Xunta nun comunicado, con estas medidas a Consellería cumpre o establecido nas bases reguladoras do programa, nas que se define o modelo de financiamento para os grupos de investigación do SUG nos anos próximos e co que se desenvolven as bases reguladoras publicadas o pasado mes de febreiro.

Así, o secretario xeral de Universidades, José Alberto Díez de Castro, este importe "confirma" que xerar coñecemento a través da investigación forma parte das "prioridades" e "apostas estratéxicas" da Comunidade respecto á actividade universitaria.

MODALIDADE DE AXUDAS

Tres das catro convocatorias son continuadoras das axudas realizadas ata agora como son as destinadas a grupos de referencia competitiva, redes e agrupacións estratéxicas; mentres que unha é de nova creación, trátase da dirixida a grupos con potencial crecemento, os cales sen chegar ao nivel de excelencia, están en disposición de conseguilo se realizan un esforzo adicional cara á consolidación.

No caso dos grupos de referencia competitiva --os máis fortes do SUG-- concédense entre 12 e 14 axudas, cun importe que varía entre os 50.000 e os 100.000 euros por grupo, cunha duración de catro anos. No tocante ás redes, o obxectivo é conceder 10 axudas, cunha duración de dous anos e un importe anual de 60.000 euros.

Para a modalidade de grupos con potencial de crecemento está prevista a concesión de 96 axudas por un período de dous anos e cun importe de 35.000 euros anuais.

A modalidade de agrupacións estratéxicas, vai destinada a unidades de investigación que xa obtiveron estas axudas nas convocatorias de 2008 ou 2009 -- a convocatoria prevé a concesión de oito partidas, cun importe de 250.000 euros durante dúas anualidades -- . Pola súa parte as outras tres modalidades van destinadas a novas concesións, o que significa que non son prórrogas.