Fernández "impulsará" una comisión d'investigación pal 'Casu Marea' y aplicará recortes, pero non "austeridá abrasiva"

UVIÉU, 22 de Mayu (EUROPA PRESS)

El candidatu del PSOE a la presidencia d'Asturies, Javier Fernández, anunció esti martes qu'el so grupu parlamentariu va impulsar, tres les conversaciones con UPyD, una comisión d'investigación nel parlamentu asturianu sobre'l 'Casu Marea', la presunta trama de corrupción qu'afectó al últimu Gobiernu socialista. También reconoció que va aplicar recortes y axustes, pero non "una austeridá abrasiva"

Fernández, na sesión plenaria d'elección de presidente, esplicó que lo qu'a los socialistes-yos estorba ye "l'abaruyamientu inútil, la sospecha fácil y el bilordiu gratuitu", sobre un asuntu que foi sometíu a investigación xudiciales y que, dende qu'entamó, celebráronse yá dos elecciones autonómiques. "Nun mos cafia la lluz nin la claridá", dixo Fernández, qu'añadió que'l so grupu parlamentariu "nun tien nada que tapecer".

"Los xestores públicos tamos obligaos a rindir cuntes ante los ciudadanos ,que nun son suxetos pasivos que s'activen namás una vez cada cuatro años pa damos o quitamos la so "confianza", apuntó, mostrándose contrariu a siguir dando ales a la "desafección ciudadana". Al so xuiciu, la ética pública ye un "imperativu".

Fernández va promover un Sistema d'Integridá Pública y una Llei del Bon gobiernu que "contribuya a meyorar la confianza na política y na xestión pública".

El candidatu socialista, l'únicu que se presentó, esplicó que los sos apoyos (IX y UpyD) tamién-y plantegaron el cambiu de la llei electoral. Anque dexó claro que considera qu'esti asuntu tien que modificase col acuerdu mayoritariu de la Xunta Xeneral del Principáu. Pa ello crearáse una comisión non permanente pa debatir la posible revisión d'esi réxime electoral, pa buscar el métodu que consideren más acertáu.

RECORTES

El candidatu del PSOE reconoció tamién qu'el so Gobiernu va ser austeru y va aprobar "recortes y axustes", añediendo que nun va haber árees exentes. "Nin lo niego nin lo tapezo", señaló. Sicasí, dixo que va demostrar que "nun hai un solu calce pa l'austeridá".

Asina, dixo que'l so Gobiernu nun va aplicar una "austeridá abrasiva" onde namás prime'l principiu de sálvese "quien puea". Nesti sen, señaló que la orientación progresista y socialdemócrata" del so Gobiernu va ser inequívoca. Nun va almitir "l'esguace" del estáu del bienestar.

De la que garantizó que va cumplir la llei d'estabilidá , dexó claro que nun ta dispuestu a tornar a Asturies nun "ariete" o "comunidá montaraz que desafía al Gobiernu central". Nesti sen ofreció "cooperación y llealtá" al Executivu de Mariano Rajoy, evitando "enfrentamientos gratuitos".

SANIDÁ

Polo que se refier a la Sanidá, Fernández destacó la calidá" de los servicios asturianos, onde l'atención sanitaria ye de les meyor valoraes d'España. Piensa qu'empeorar la so calidá sería "el peor esbardie" qu'Asturies podría cometer, amás d'una agresión" a l'actual cohesión social.

Sicasí, dixo qu'al so Gobiernu nun-y quedará más remediu que xestionar la sanidá coles nueves y "restrictives" condiciones qu'impunxo l'Executivu de Mariano Rajoy, col copagu en delles prestaciones de la cartera de servicios y la regresión", que supón dexar fuera del sistema a determinaos colectivos. "Va Haber colectivos qu'inxustamente van quedar sin cobertoria", llamentó.

SERVICIOS SOCIALES

Sobre la Llei de Dependencia, Fernández esplicó que la norma llevantó unes espectatives que nun se cumplieron íntegramente. Sicasí, dixo que va trabayar pa que n'Asturies haya ayudes a les persones dependientes y unos servicios sociales de calidá. Tamién van defender el caltenimientu de la prestación del salariu social.

Recordó qu'Asturies tien un grau d'avieyamientu mayor qu'otres poblaciones, colo qu'estos aspectos son fundamentales. Pero amás, dixo que quier ampliar la rede d'escueles 0-3 años, y van fomentar la conciliación llaboral. "Pretendemos arrexuntar estes cuestiones nun pactu demográficu que vamos debatir nesta Cámara pa llograr el mayor apoyu posible", acabó.

INFRAESTRUCTURES

En cuestión de infraestructures, anunció que va permanecer vixilante pa que nun haya retrasos inxustificaos na abación d'obres arteriales, como la variante de Payares y les autovíes del Cantábricu y a La Espina.

Precisó, sicasí, que nun son competencies del so gobiernu, y encamentó a los Grupu de la Cámara a acordar ente toos cuáles son les prioridaes a les que se van destinase los recursos nesti capítulu, puesto que la situación nun dexa ser "tolo ambicioso que-yos prestaría"..

FUSIÓN DE CONCEYOS

De la mesma, y ente los compromisos del so Gobiernu, recordó que va ellaborase un estudiu sobre la reordenación de los conceyos, que va enviase a la Xunta pal so debate, y que va tener calter voluntariu, sin refugar la eventualidá en casos concretos.

Pese a sostener qu'Asturies nun carez la división municipal escesiva que se da n'otres comunidaes, defendió la necesidá de constituyir alministraciones llocales fuertes, que cuenten con unos mínimos recursos económicos y una estructura capaz d'emprestar los servicios públicos que los ciudadanos demanden.