Feijóo descarta a supresión do Valedor por estar no Estatuto, pero quere que rebaixe como mínimo un 25% os seus gastos

MADRID/SANTIAGO 21 May. (EUROPA PRESS) -

O presidente da Xunta, Alberto Núñez Feijóo, descartou promover a eliminación da figura do Valedor do Pobo como formularon outras comunidades, xa que no caso de Galicia, se trata dunha figura recollida no Estatuto de Autonomía, pero apostou por unha rebaixa de "como mínimo" o 25 por cento dos gastos do alto comisionado do Parlamento.

Durante a súa intervención nos Almorzos Informativos de Europa Press, Feijóo recordou que o Valedor é "unha figura estatutaria" no caso da Comunidade galega e considerou que se tratou dunha "crise por sobreactuación" a que desembocou na dimisión de Benigno López o pasado martes.

"Como presidente da Xunta, vostede pódese imaxinar que eu estou máis cómodo sen Valedor, entre outras cousas porque non teño a ninguén que me critique dende a independencia que dá esa figura", admitiu o titular do Executivo, quen engadiu, non obstante, que "sería un exercicio de certo cinismo aproveitar a crise para intentar que o Valedor do Pobo non teña ningunha posibilidade de analizar a xestión dos servizos públicos e as queixas dos cidadáns".

Ao respecto, agregou que é preciso "ser coidadosos" coas figuras estatutarias como a do Valedor, "polo ben da pluralidade e do propio control do goberno". "O que xa está reflectido no Estatuto hai que xestionalo de forma conveniente, pero a súa eliminación é cando menos certo retroceso na garantía dunha figura independente e con criterio para defender os intereses do pobo galego", aseverou.

REDUCIÓN DO GASTO

Fronte a iso, recordou que o pasado mes de marzo xa formulou a supresión de todos os vicevaledores da institución e un "recorte drástico" do persoal de asesoría. Desta forma, Feijóo pretende que o gasto do alto comisionado se reduza "como mínimo" un 25 por cento. "E se pode ser máis, intentaremos que sexa máis", engadiu.

Así mesmo, recordou que no caso doutras institucións non recollidas no Estatuto de Autonomía, se procederá á súa fusión, como no caso do conselo Económico e Social e o Consello de Relacións Laborais, por un lado, ou no do Tribunal da Competencia e o Instituto Galego de Consumo, por outra.